Ўзбекистонда дастурий маҳсулотларнинг маҳаллий бозорини ривожлантириш, давлат органлари ва маҳаллий корхоналарда энг замонавий ахборот технологияларни ривожлантириш масалаларига катта эътибор қаратилмоқда.   

Бу фаолиятдаги асосий йўналишлардан бири дастурий маҳсулотлар ишлаб чиқариш, ахборот тизимлари ва технологияларини жорий қилиш бўйича йирик хорижий компанияларни жалб қилиш ҳисобланади.

Кореянинг “LG CNS” компаниясининг бой тажриба ва кенг имкониятларга эгалигини ҳисобга олиб, “LG CNS Uzbekistan” Ўзбекистон-Корея қўшма корхонаси яратилди.

Ўзбекистонда 14 сентябрдан бошлаб ўтказилаётган Ахборот-коммуникация технологиялари ҳафталиги доирасида корхонанинг расмий очилиш маросими бўлиб ўтди.

Қўшма корхона фаолиятининг асосий йўналиши бўлиб дастурий маҳсулотларни ишлаб чиқариш, қурилмавий-дастурий мажмуаларни ўрнатиш ва татбиқ қилиш, “Электрон ҳукумат” ва иқтисодиётнинг реал сектори корхоналари учун лойиҳавий ва техник ҳужжатлаштиришни шакллантиришдан иборат.

“LG CNS Uzbekistan” корхонаси лойиҳаларни амалга оширишда маҳаллий компания ва ишлаб чиқарувчилар билан ҳамкорлик қилиш ва уларни жалб қилишни режалаштирмоқда. Бу эса ўз навбатида ахборот технологиялари маҳаллий бозорини ривожлантиришга ижобий таъсир кўрсатади.

Айни пайтда қўшма корхона “Электрон ҳукумат” тизимининг йирик лойиҳаларини амалга оширишни бошлади. Бу лойиҳалар замонавий ахборот тизимлари ва давлат муассасалари маълумотлар базасини ва интерактив давлат хизматларини татбиқ қилиш учун ишончли инфратузилмани шакллантиришни таъминлайди.