Шу йилнинг 1 октябрь кунидан Ўзбекистон аҳолиси ва улгуржи истеъмолчиларга бериладиган табиий газ учун Молия вазирлиги томонидан тасдиқланган янги тарифлар жорий қилинмоқда.

«Узбекнефтегаз» Миллий холдинг компанияси берган маълумотларга кўра, янги нархлар Ўзбекистон Молия вазирлигининг 2015 йилнинг 15 сентябрида № 19-03-22-05-РУз-92-2015 рақами остида рўйхатдан ўтказилган қарори асосида ўрнатилган.

Янги прейскурантга кўра, аҳолига бериладиган табиий газнинг 1 кубометри ҳисоблагич бўлган ҳолда 194,7 сўмдан 208,9 сўмга оширилади. Ҳисоблагич бўлмаган ҳолда овқат пишириш ва иссиқ сув таъминоти учун ишлатиладиган газнинг 10 кубометри 3612,95 сўмни ташкил қилади (жорий тариф — 3367,05 сўм). Иситиш учун фойдаланиладиган газнинг 10 кубометри 1561,5 сўмдан 1675,55 сўмга ошади.

Тошкент шаҳрида табиий газ учун нархлар охирги марта шу йилнинг 15 май кунида оширилганди.

Эслатиб ўтамиз, Тошкент шаҳрида 1 октябрдан совуқ сув ва иссиқ сув ҳамда иситиш тизимлари таъминоти хизмати учун ҳам янгиланган тарифлар жорий этилади.