Россиянинг Шереметьево аэропортида транспорт полицияси Шанхай-Москва рейсида парвоз вақтида самолёт бортида тўполон кўтарган йўловчини қўлга олди. Бу ҳақда Россия Федерацияси ИИВ транспорт бошқармаси ТАСС нашрига маълум қилган.

Агентлик суҳбатдошининг сўзларига кўра, ҳодиса 15 сентябрь куни содир бўлган. Экипаж командирига бортда безори йўловчи тўполон кўтариб, бошқа йўловчиларни ҳақорат қилаётгани ва икки телевизорни синдиргани тўғрисида хабар қилинган.

“Москва вақти билан 16:45 (Тошкент вақти билан 17:45)да қўнган самолёт йўловчиси қўлга олинди. Маълум бўлишича, безори Шанхайдан Москвага парвоз қилган Молдавия фуқароси бўлиб чиқди. Эркак киши полиция бўлимига олиб келинган ва ҳибсга олинган. Бугун у жавобгарликка тортилиш учун судга олиб кетишган”, – деди агентлик суҳбатдоши.

Авиакомпания маълумотларига кўра, фақатгина синдирилган телевизорлардан кўрилган моддий зарар миқдори 700 минг рубль (тахминан 10 минг доллар)дан ортади.