Шанхай ҳамкорлик ташкилоти (ШҲТ) мамлакатлари иқтисод ва савдо вазирлари Хитойнинг “Ипак йўли иқтисодий камари”ни ташкил этиш тўғрисидаги ташаббусини қўллаб-қувватлайди. Бу ҳақда Хитойнинг Шэнси провинцияси маъмурий маркази Сиан шаҳрида бўлиб ўтган ШҲТ вазирлар мажлиси якунлари бўйича эълон қилинган ахборот ҳужжатида маълум қилинди.

Ҳужжатда қайд этилишича, томонлар ШҲТга аъзо давлатларнинг ташқи иқтисодий ва ташқи савдо фаолиятига жавобгар вазирлари ўртасида маслаҳат ва ахборот алмашишларни йўлга қўйишга тайёр. Вазирлар ШҲТ доирасида электрон савдо, транзит имкониятлари ва инвестицияларни ўз ичига олган савдо-иқтисодий ҳамкорликнинг асосий йўналишлари бўйича фаолиятни кучайтиришга қарор қилишди. Шу мақсадда Қозоғистон раислигида савдоларни соддалаштириш бўйича махсус ишчи гуруҳ ташкил этиладиган бўлди.

Кенгаш йиғилишида ШҲТга аъзо давлатлар (Хитой, Россия, Ўзбекистон, Қозоғистон, Қирғизистон ва Тожикистон) вакилларидан ташқари, кузатувчи давлатлар (Афғонистон, Беларусь, Ҳиндистон, Эрон, Мўғулистон, Покистон) вакиллари ҳамда музокаралар бўйича ҳамкорлар (Озарбайжон, Арманистон, Камбожа, Непал) ҳам иштирок этди.

24-26 сентябрь кунлари Сианда ШҲТ мамлакатлари маҳсулотларининг кўргазмаси ташкил этилиб, унда ШҲТ кузатувчи давлатлари ва музокаралар бўйича ҳамкорлари ҳам қатнашади.