Сурхондарёлик қаллоб чет элда 20 нафар қишлоқдошини ишлатиб, уларнинг 135 млн сўмлик иш ҳақини ўзлаштирди. Бу ҳақда “Постда” нашри ёзмоқда.

Айтилишича, Олтинсой туманида истиқомат қилувчи Алибой Кўчимов узоқ йиллар Россияда ишлаб, кўплаб танишлар орттириб, юртига қайтган. Бу ерда у 3 нафар йигитни “ёллаб”, Қозонга олиб кетган ва бир ой мобайнида ишлатиб, уларнинг иши эвазига буюртмачилардан 8 млн сўмдан ортиқ пул олган, лекин ишчиларга пул бермаган.

Бундан ташқари, у қишлоқдоши Комил Оқбоевни ўзига шерик қилиб, уни Сурхондарёдан Қозонга 17 ишчи олиб келишга кўндирган. Бу ишчиларни ҳам бир неча ой мобайнида ишлатиб, уларга иш ҳақларини бермаган.

Ўзбекистонга қайтиб келган йигитлар тегишли идораларга арз қилгач, Алибой Кўчимовнинг ишлари фош бўлган. Суд жараёнида аниқланишича, у 20 нафар инсонга жами 135.2 млн сўм моддий зарар етказган экан.

Фирибгар узоқ муддатга озодликдан маҳрум қилинди.