Башар Асад режими Суриянинг 18 фоизидан камроқ ҳудудини ўз назорати остида ушлаб турибди, шу боис Россия ўз “ёқимтой”ига ёрдам кўрсатишга қарор қилди.

Асад айни пайтда Россиянинг минтақадаги таъсирини сақлаб турувчи куч ҳам ҳисобланади. Бу фикрлар “Дамашқ декларацияси” партияси вакили, мухолиф Сурия миллий кенгаши вакили Маҳмуд ал-Ҳамза томонидан айтиб ўтилди.
“Суриянинг 18 фоизидан камроқ ҳудуди Асад назорати остида турибди. Қолгани Эрон ҳарбийлари ва Ливаннинг “Ҳизбулло” партияси назорати остида турибди.

Ўйлашимча, Россия Асад ҳокимиятига ҳар қандай лаҳзада чек қўйилиши мумкинлигини тушунди, бунда эса у Сурияга таъсирини йўқотади. Агар Дамашқ қуласа, Асадни Латақияда қабул қилиш мумкин бўлади. Шу боис у ерда ҳарбий базалар яратилмоқда, россиялик ҳарбий маслаҳатчилар ва Россия ҳарбий техникаси у ерга йўлланмоқда. Ҳали ҳаммаси олдинда”, - унинг сўзларини келтиради Baltkom нашри.

Ал-Ҳамзанинг ишонтириб айтишича, АҚШнинг мухолифатга кўрсатаётган ёрдами Россиянинг Башар Асадга бераётган ёрдамидан камроқдир: “Ростини айтсам, Обама Сурия мухолифатига жуда кам ёрдам кўрсатмоқда. Шу боис Россия Сурияга нисбатан мустаҳкам позицияда турибди.

Афсуски, Сурия озод армияси кучлилигида, Асадни йиқита оладиган пайтида АҚШ танкларга ва ҳаво ҳужумига қарши ракеталар етказишни бойкот қилди”.
2011 йили бошланган ихтилоф оқибатида, БМТнинг ҳисоб-китобига кўра, Сурияда 220 минг киши ҳалок бўлди.