Тайваннинг Thunder Power компанияси Франкфурт автосалонида Tesla Model S моделига рақобат қилиши мумкин бўлган электр седанни илк бор намойиш қилди.

Номи ҳозирча айтилмаётган тўрт эшикли автомобилнинг оғирлиги 2 минг килограммга яқинни ташкил қилди. Седан 308 ва 428 от кучига эга бўлган иккита электр моторга эга вариантларда ишлаб чиқарилади. Моделнинг қуввалтироқ варианти соатига 100 км тезликка 5 сонияда эришади, максимал тезлиги эса электроника ёрдамида соатига 250 км тезлик билан чегараланади.

Унинг иккила модификацияси 125 киловатт-соат ҳажмли аккумулятор блоки билан жиҳозланади. Батареялар захираси 650 км йўл босишга етади. Компанияда таъкидланишича, аккумуляторларни ярим соат ичида тўлдириб, 300 км йўл босиб ўтиш мумкин.

Моделнинг стандарт жиҳозланишига ABS, барқарорлаштириш тизими, “ўлик” ҳудудларни назорат қилиш ва ҳаракатланишнинг қаторланишини кузатиш функциялари киритилган.

Thunder Power стендида, шунингдек, седаннинг спорт версияси – Race ҳам мавжуд бўлиб, у ҳақда ҳозирча ҳеч қандай маълумот йўқ.

Thunder Power компаниясининг автомобиллари асосан Хитойда ишлаб чиқарилади. Шу билан бирга тайванликлар бу машинани Европада ҳам ишлаб чиқаришни режалаштиришмоқда. Машиналар 2017 йилдан бошлаб сотувга чиқарилади.