Туркия ҳукумати умумий ҳисобда “ИШИД” террорчилик гуруҳи билан алоқадорликда айбланган 165 кишини ҳибсга олди, деб айтди Туркия президенти матбуот котиби Иброҳим Қалин.   

Туркия хавфсизлик нуқтаи  назаридан Эрон билан учта назорат-ўтказиш пунктини ёпиб қўйди.

“Туркия “ИШИД”га қарши курашни давом эттирмоқда, биз “ИШИД”нинг Суриядаги позицияларига авиазарбалар бермоқдамиз ва чегарада хавфсизлик ҳудудларини яратиш бўйича ишларни давом эттирмоқдамиз. Террорчилик гуруҳи билан алоқаси бўлган 20 мингдан кўпроқ одамга Туркияга кириш ман қилиб қўйилган. 500 га яқин одам ушланган ва 165 киши “ИШИД” билан алоқадорликда айбланиб ҳибсга олинган”, деб айтди Қалин Анқарада бўлиб ўтган матбуот-анжуманида.    

Қалин Суриядаги “ИШИД” сафига қўшилган хорижий жангарилар учун жавобгарликни фақатгина Туркия зиммасига қўйиб бўлмаслигини, чунки у ҳар доим ҳам бошқа давлатлар ҳукуматларидан гуруҳ билан алоқадорликда гумон қилинаётган уларнинг фуқаролари ҳақида маълумот олмаслигини қўшимча қилиб ўтди.