АҚШ Россия ва Суриядан фарқли равишда, ўз ҳарбий кампаниясини мамлакат ички ишларига аралашиш учун баҳона сифатида қўллаб, ИШИД жангариларига қарши жиддий кураш олиб бормаяпти. Бу ҳақда ТАСС мухбирига БМТнинг Сурия Араб Республикасидаги доимий вакили Башар Жаафари маълум қилди.

“Назарий жиҳатдан олиб қараганда, барчамиз битта душманга қарши кураш олиб бораяпмиз. Бироқ ҳақиқатда бундай эмас, – деди дипломат. – Фақатгина Сурия армияси, руслар ва бизнинг бошқа дўстларимиз террористларга қарши, улар хоҳ ИШИД, хоҳ “Ан-Нусра” ёки бошқа ҳар қандайи бўлсин, ҳақиқатдан ҳам кураш олиб бормоқда”.

Унинг сўзларига кўра, Америка томони “ИШИДдан Сурия ички ишларига аралашиш учун восита ўрнида фойдаланмоқда”, шунингдек, террористлар ёрдамида “Сурия ҳукуматини кучсизлантириш, қоралаш ва Сурия президентини бадном қилиш”га ҳаракат қилмоқда.

“Агарда уларнинг ҳаракатига жиддий эътибор қаратилса, улар стратегияси “ДАИШ” (ИШИДнинг арабча номланиши)га қарши кураш олиб боришга асосланмаган”, дея ишонч билдирди Башар Жаафари.

Дипломатнинг сўзларига кўра, АҚШ ҳақиқатдан ҳам ИШИДга қарши курашмоқчи бўлса, Сурия армияси билан бирлашиши керак.