Миробод бозорида 5 минг сўмлик купюраларни майдалаш баҳонаси билан қаллоблик қилиб келган шахс ушланди. Бу ҳақда “Огоҳ” нашри ёзмоқда.

Айтилишича, Раҳимжон Комилов исмли шахс Тошкентнинг Миробод туманидаги деҳқон бозорида деярли ҳар куни ўралашиб юриб, “мижоз” қидирган. Уларни чув туширишда эса ҳар доим бир хил усулдан фойдаланган – 5 минг сўмлик купюралари борлигини айтиб, шуларни майдалаб беришни илтимос қилган, ёнидан маълум миқдорда минг сўмлик купюралар чиқариб берган одамлардан бу пулларни олиб, турли баҳоналар билан кўздан ғойиб бўлган.

Шу йўл билан у савдогар Дилобар Юнусовадан 1.5 млн сўм, Ханифа Турсуновадан 2.7 млн сўм олган. Аммо Раиса Мамедова исмли аёлдан ҳам шунча миқдорда пулни олиб қочмоқчи бўлганида аёлнинг қичқириқларини эшитиб ёрдамга етиб келган одамлар томонидан қўлга олинган ҳамда милицияга топширилган.