60 ёшга яқинлашиб қолган фуқаролар Қодир Оҳунов, Ҳусан Илҳомов ва Фаёз Ғофуровлар томонидан чет элга меҳнат муҳожири сифатида кетаётган инсонларга хизмат кўрсатиш мақсадида ташкил этилган фирма ноқонуний даромад олишда айбланиб ёпилди. Бу ҳақда “Огоҳ” газетаси хабар берди.

Айтилишича, юқорида тилга олинган шахслар чет элга кетаётган инсонларни ўзларига тегишли автоуловда Ғишткўприк постигача олиб бориб қўйиш билан шуғулланиб келишган. Аммо уларнинг фаолияти ҳужжатлар асосида олиб борилмай, кўпгина ҳуқуқий актларга зид келарди.

2015 йил апрелида ДСИ ходимлари томонидан ўтказилган текширув давомида корхона идорасидан 39 варақли иккиламчи даромадлар дафтарчаси топилди. Ундан 2013-2015 йиллар давомида юқоридаги шахслар ўз фаолиятларидан 57 млн сўм даромад олгани, аммо бу пуллар солиққа тортилмагани маълум.

Суд жавобгарларнинг ёши, муқаддам судланмагани ва оилавий аҳволини инобатга олиб уларга нисбатан жарима жазосини қўллашни маъқул топди.