Тошкент шаҳридаги ёнғин туфайли юз берган тирбандлик вақтида пиёдалардан бири кўнгилли равишда машиналар ҳаракатини назорат қилишда ёрдамлашди.

Бугун, Тошкент 18 сентябрь куни Тошкент шаҳрининг Амир Темур шоҳкўчаси ва Шаҳрисабз кўчалари кесишмасида жойлашган «Wyndham Tashkent» (собиқ «Dedeman») меҳмонхонаси ёнидаги бизнес-марказида ёнғинни бартараф этиш чоралари кўрилаётган вақтда атрофдаги кўчалардан иккитасида қатновлар тўсиб қўйилди.

Бу вақтда атрофдаги бошқа кўчаларда машиналар тирбандлиги юзага келган.

Ёнғин жараёнини кузатиш учун воқеа жойига жўнатилган мухбирнинг хабар беришича, бу вазиятни назорат қилаётган Йўл-патрул хизмати ходимлари сонида камчилик (3 нафар) кузатилган.

Натижада, кўнгиллилардан бири ЙПҲ ходимларига ёрдамга келган.

Манбанинг айтишича, ёши тахминан 50 ёшда бўлган кўнгилли йўловчи чорраҳада турган ҳолатда қўлида махсус таёқча билан машиналарни керакли вақтда керакли томонга йўналтириб турган. Унга параллел йўллардаги ҳаракатни назорат қилаётган ЙПҲ ходимлари баланд овозда керакли кўрсатмаларни бериб туришган.

Айни вақтда ёпилган йўллардан бири очилган, ёнғинни бартараф этиш ишлари бутунлай якунланмагани туфайли яна бир йўлда ҳаракатга ҳозирча рухсат берилмаган.

Эслатиб ўтамиз, «Wyndham Tashkent» меҳмонхонаси ёнидаги бизнес марказида (эски номи - "Лето бар") чиққан ёнғинни бартараф этиш ишларига 10та ўт ўчирувчи машина (шундан 5таси сув пуркагичли, 5таси нарвонли) жалб этилган.

Дастлабки маълумотларга кўра, бу ёнғин туфайли жароҳат олганлар йўқ.