Мексика ҳукумати 11 ой аввал Игуала шаҳрида 43 талабани ўғирлашда гумон қилинган шахсни қўлга олди, деб хабар бермоқда Animal Politico нашри.

Полиция Герреро штатининг Хиль шаҳрида Хильдардо Лопес Астудильо исмли шахсни қўлга олди.

Бу орада Астудильо яшриниб юриб, камида уч марта турар жойини ўзгартирган. Қайд этилишича, талабаларнинг ўғирланишига алоқадор бўлганлар уни бевосита ижрочи сифатида кўрсатишган.

2014 йилнинг 26 сентябрида полиция ва бандитлар талабалар намойишида иштирок этаётганларга ҳужум қилиб, воқеа жойида 6 кишини ўлдиришган. Бу ҳужум ортида яна 43 нафар талаба изсиз йўқолган. Кейинроқ шаҳар ташқарисида шахси аниқланмаган 28та жасаддан иборат оммавий қабр топилган.

Бундан ташқари, Игуала полицияси билан алоқадор икки нафар ёлланма қотил 43 нафар талабадан 17 нафарини ўлдирганини тан олган.