Америкалик миллиардер Дональд Трамп АҚШ президентлигига сайланган тақдирда, давлат раҳбари лавозими учун тайинланадиган маошдан воз кечишини маълум қилди. Бу ҳақда у Нью-Гэмпшир штатидаги Рочестер шаҳрида тарафдорлари билан бўлиб ўтган учрашув вақтида маълум қилди, дея хабар бермоқда Reuters.

“Агарда мени президент қилиб сайлашса, биринчи бўлиб қиладиган ишим маошдан воз кечиш бўлади”, – деди Трамп. Унинг фикрича, йилига 400 минг доллардан воз кечиш “катта муаммо” эмас.

Forbes журнали маълумотларига кўра, Трамп кўчмас мулк ва қурилиш соҳасида фаолият кўрсатиб, 4,1 млрд долларлик бойлиги билан дунё миллиардерлари рўйхатида 405-ўринда туради. Ўзининг тасдиқлашича эса, унинг маблағлари 10 млрд доллардан ошади.

Бундан аввал АҚШнинг икки собиқ президенти ойлик маошдан воз кечган. Улар тоғ-кон саноатида ўз даромадига эга бўлган Герберт Гувер ва бой оиладан чиққан Жон Кеннедидир.

Маълумотларга кўра, айни пайтда АҚШ президентлиги учун 20 нафардан зиёд номзод кураш олиб бормоқда. Сўнгги сўровномалар натижасига кўра, Республикачилар партиядан Трамп энг катта обрўга эга бўлса, Демократлар партияси номзодлари ичида собиқ давлат котиби Ҳиллари Клинтон етакчилик қилмоқда.