Туркиянинг Самсун шаҳрида таэквондонинг ВТФ йўналиши бўйича йилнинг нуфузли мусобақаларидан бири – Гран-При турнири давом этмоқда. 18 сентябрь куни мусобқанинг илк кунида мутлоқ вазн (+87) тоифасидаги баҳслар бўлиб ўтди. Унда бир йўла ўзбекистонлик икки нафар спортчи даянга чиқди. Бу ҳақда olamsport.com хабар берган.

Дунё рейтингида биринчи ўринни эгаллаб турган Жасур Бойқўзиев иккинчи давра баҳсида кореялик Чи Жол Хога олтин очко фарқи билан 3:4 ҳисобида имкониятни бой бериб қўйди. Айнан кореялик таэквондо устаси якунда Самсун Гран-Приси ғолиблигини қўлга киритди.

Амалдаги жаҳон чемпиони Дмитрий Шокин эса ярим финалга қадар мағлубиятсиз етиб борди. Бу босқичда эса эронлик рақибига 5:6 ҳисобида ютқазиб, бронза медали билан тақдирланди.

Қайд этиш керакки, ҳар икки спортчи рейтингда ўз ўринларини сақлаб қолишди. Жасур Бойқўзиев 338 очко билан ҳамон биринчи ўринда. Шокин эса иккинчи поғонадан жой олган. Бугун ака-ука Максим ва Никита Рафалович медаллар учун баҳсларга киришишади.