Мисрда Шериф Исмоил раҳбарлигидаги янги ҳукумат мамлакат президенти Абдуль Фаттоҳ ас-Сиси олдида қасамёд қилди. Бу ҳақда “Ал-Ахрам” газетаси хабар берган.

Бир ҳафта аввал амалдаги Иброҳим Махляб бошчилигидаги вазирлар маҳкамаси тўлиқ таркиб билан истеъфога чиққанди ва шу куни президент томонидан истеъфоси қабул қилинганди.

Истеъфога чиққан бош вазир ўтган йилнинг июнь ойидан буён мазкур лавозимда ишлаб келаётган бўлиб, у коррупция билан боғлиқ можаро боис лавозимидан кетишга мажбур бўлди.

Янгиланган ҳукумат таркибида ички ишлар, молия, инвестиция ва бошқа бир қатор вазирлар ўз ўрнида қолди.