“Челси” ярим ҳимоячиси Виллиан АПЛ 6-тур “Арсенал”га қарши ўтадиган учрашувда иштирок эта олмайди. Бу ҳақда Жозе Моуриньо маълум қилган.

У клубнинг яна бир неча футболчиси дерби баҳсини ўтказиб юбориши мумкинлигини ҳам айтиб ўтган.

"Педро, Фалькао ва Оскар ҳам бу ўйинда қатнашмаслиги мумкин. Ҳозирча аниқ гап айта олмайман. Ўйин учун таркибни охирги машғулотдан кейин тузаман", деган португалиялик мутахассис.

Эслатиб ўтамиз, “Челси” - “Арсенал” учрашуви 19 сентябрь куни бўлиб ўтади ва Тошкент вақти билан 16.45да бошланади.

Бу жамоаларнинг охирги учрашуви шу йилнинг 4 августида ўтказилган, Англия Суперкубоги учун баҳсда "Арсенал" 1:0 ҳисобида ғалаба қозонганди.

Маълумот учун, ушбу икки жамоа АПЛ ташкил топганидан буён "Стемфорд Бриж" стадионида 23 марта ўзаро ўйин ўтказишган ва бу ўйинларда "Челси" 10 марта, "Арсенал" 7 марта ғалаба қозонган. Яна 6та ўйин эса дуранг натижа билан якунланган.