Ўзбекистонда журналистларнинг профессионал этикаси кодекси лойиҳаси ишлаб чиқилди. Бу ҳақда UzReport хабар берди.

Ушбу лойиҳа Журналистлар ижодий уюшмаси ва Ўзбекистон босма ОАВ фонди томонидан журналистлар ва соҳа экспертлари, фуқаролик институтлари, манфаатдор ташкилотлар вакиллари иштирокида яратилди.

Мазкур ҳужжат Ўзбекистон Конституцияси ва қонунчилиги асосида, шунингдек, Умумжаҳон инсон ҳукуқлари декларацияси, Халқаро журналистикада профессионал этика тамойиллари, Халқаро журналист ахлоқи тамойиллари декларацияси ҳисобга олинган ҳолда ишлаб чиқилди.

Журналистлар профессионал этикаси кодексининг қабул қилиниши мамлакатда инсон, унинг манфаатлари, ҳуқуқлари ва эркинлиги юксак қадрият саналган демократик жамиятнинг шаклланиши, ОАВ мустақиллигини мустаҳкамлаш, фуқароларнинг ҳуқуқий маданияти, билими ва онгини оширишга хизмат қилади.

Айни вақтда бу йўналиш бўйича 20дан ортиқ мавзулар кўриб чиқилмоқда. Маълум қилинишича, ахборот соҳасини ривожлантириш, сўз ва ахборот эркинлигини таъминлаш, журналистлар фаолиятини тартибга солиш бўйича АҚШ, Германия, Буюк Британия, Австрия, Жанубий Корея, МДҲ давлатларининг тажрибаси, шунингдек, БМТ, ЕХҲТ, ЮНEСКО ва бошқа катор халқаро тузилмаларнинг ҳужжатлари ҳам ўрганиб чиқилди.