Хорватия Ички ишлар вазири Ранко Остоич ҳафта ўрталарида Венгрия ўзининг Сербия билан чегарасини ёпиб қўйгандан кейин Хорватияга 17 мингдан кўпроқ муҳожир келганини маълум қилди. Улардан 3 мингдан кўпроғи Венгрияга ўтган, деб хабар бермоқда Reuters ахборот агентлиги. 

Хорватия полицияси чегарадан 17069 киши ўтганини айтмоқда, бироқ муҳожирлар ҳамон Сербия орқали Хорватияга келишмоқда.

Хорватия полицияси Сербия чегараларига олиб борувчи барча еттита назорат-ўтказиш пунктларини ёпиб қўйди. Муҳожирлар Хорватия орқали бошқа давлатларга ўтишга ҳаракат қилишмоқда. Хорватиядан муҳожирлар бор бир нечта автобуслар Венгрия чегарасига келтирилди ва у ерда венгр полициячилари томонидан қабул қилинди.

Аввалроқ Хорватия бош вазири Зоран Миланович мамлакат бошқа муҳожирларни қабул қилмаслиги ва рўйхатдан ўтказмаслигини маълум қилган эди.