Япония парламенти олий палатаси кўпчилик овоз билан миллий мудофаа кучларининг ваколатларини кенгайтириш ҳақидаги қонунлар пакетини қабул қилди, деб хабар бермоқда Reuters ахборот агентлиги.

Қабул қилинган қонун лойиҳалари япониялик ҳарбийларга Иккинчи жаҳон урушидан бери биринчи марта Японияга ҳужум қилинмаётган бўлсада, дўстона давлатларни ҳимоя қилишда жанговор ҳаракатларда иштирок этишга имкон беради.

Япония бош вазири Синдзо Абэ бу ўзгариш Хитой қудратининг ошиши каби жаҳондаги янги чақириқларга жавоб бериш сифатида ҳаётий даражада муҳим эканлигини таъкидлаб ўтди. 

Аввалроқ Япония парламентининг олий палатаси қўмитаси мамлакат конституциясига Япониянинг хориждаги ҳарбий ҳаракатларда иштирок этишига ҳуқуқ берувчи ўзгартиришлар киритган эди.