Ҳиндистонда юз берган ҳалокатли йўл-транспорт ҳодисаси натижасида ҳиндларнинг қадимий спорт тури бўлмиш кабадди билан шуғулланувчи 9 киши ҳалок бўлган ва яна 15 киши тан жароҳатлари олган. Бу ҳақда NDTV хабар берган.

Маълум қилинишича, 19 сентябрь куни кечаси спортчилар кетаётган автобус Орисса штати шарқидаги кўприкдан жарликка қулаб тушган. Ушбу автобус спортчиларни мусобақа ўйинидан уйларига олиб қайтаётганди. Ҳалок бўлганлар орасида 18 ёшдан 60 ёшгача бўлганлар борлиги айтилган.

Манбанинг айтишича, бу ҳодисага ҳайдовчининг бошқарувни йўқотиши сабаб бўлган.

Қурбонлар сони ортиши мумкинлиги айтилган.

Маълумот учун, кабадди Осиёда милоддан аввалги даврлардан бери ўйнаб келинадиган спорт тури бўлиб, ватани Ҳиндистон ҳисобланади. Баъзи манбаларда бу спорт 4 минг йил олдин пайдо бўлгани айтилади. Ушбу спорт ўзида жамоавий кураш элементларини жамлаган.

1980 йилда Ҳиндистонда ушбу спорт тури бўйича биринчи марта Осиё чемпионати ўтказилганди.