Минскда эксперт гуруҳи йиғилишида МДҲнинг террорчиликка қарши кураш бўйича баёноти лойиҳаси маъқулланди, деб хабар бермоқда РИА “Новости” ахборот агентлиги.  

Ҳужжатда халқаро хавфсизлик ва тинчликка бевосита хавф солувчи террорчилик гуруҳлари фаолиятининг кескин ошиши ҳамда “тинч аҳолининг, жумладан асирларнинг оммавий равишда қатл этилиши, террорчилар томонидан тарихий ва маданий ёдгорликлар, диний қадамжоларнинг ваҳшиёна барбод қилиниши” билан боғлиқ ҳолда “чуқур хавотирланиш” билдирилган.

Ҳужжат жаҳон ҳамжамиятининг барча аъзоларига БМТ Бош ассамблеяси ва Хавфсизлик кенгашининг аксилтеррорчилик резолюциясининг барча шартларини сўзсиз бажаришга чақирувни ўз ичига олган.  

Шунингдек, террорчилик гуруҳлари ва уларнинг фаолиятига алоқадор бўлган шахслар томонидан ОАВ ва интернетдан фойдаланишни чеклаш бўйича чоралар кўриш зарурлиги таъкидлаб ўтилган.

Бундан ташқари, “террорчиликка қарши кураш, зўравонлик, миллий тоқатсизлик ва адоватнинг олдини олиш бўйича миллий қонунчиликни такомиллаштириш бўйича келишилган ҳаракатларни жорий қилиш зарурлиги” кўрсатиб ўтилган.   

Ҳужжатда террорчиликка қарши кураш соҳасида барча манфаатдор давлатлар ва халқаро ташкилотлар билан самарали ҳамкорлик қилишга тайёргарлик билдирилди.