Куба етакчиси Рауль Кастро мамлакат пойтахтидаги Хосе Марти номидаги халқаро аэропортда бу ерга шанба, 20 сентябрь куни Alitalia авиакомпаниясининг махсус рейси билан келган Рим папаси Франциск билан учрашди.

Рим католик черкови раҳбари ўзининг руҳонийлик ташрифини Кубадан бошлаб, сўнгра Америка Қўшма Штатлари сафарига йўл олади.

Учрашув чоғида Куба раҳбари Рим папасига АҚШ ва Куба ўртасида воситачилик қилаётгани учун миннатдорчилик билдирди. Рауль Кастро, шунингдек, Америка томонидан орол-давлатнинг блокада қилиниши тўхтатилиб, АҚШ эгаллаб олган Куба ҳудуди ҳисобланувчи Гуантанамодаги ҳарбий денгиз базасини қайтариш зарурлигини ҳам айтиб ўтди.

“Зўрлик билан эгаллаб олинган Гуантанамо ҳарбий денгиз базаси ҳудуди Кубага қайтарилиши керак”, – деди Кастро понтифик билан учрашувга бағишланган маросимда.

Рим папасига сафар чоғида ўттиздан зиёд кишилар ҳамроҳлик қилмоқда. Жумладан, Ватикан давлат котиби кардинал Пьетро Паролин ва “ташқи ишлар вазири” архиепископ Пол Ричард Галлахер, шунингдек, Alitalia компаниясининг AZ4000 рейси билан дунёнинг етакчи ОАВ журналистлари ташриф буюрган.

Папанинг хориж сафари 28 сентябргача давом этиб, папа Франциск 26 маротаба нутқ ўқийди — уларнинг 4таси инглиз, қолганлари испан тилида бўлади. Ушбу нутқлар олтита шаҳар — Куба оролидаги Гавана, Ольгин, Сантьяго-де-Куба, АҚШнинг Вашингтон, Нью-Йорк ва Филадельфия шаҳарларида бўлиб ўтади.