Туркиянинг Самсун шаҳрида таэквондонинг ВТФ йўналиши бўйича йилнинг нуфузли мусобақаларидан бири – Гран-При турнири якунланади. Аввал хабар берилганидек, мусобақанинг илк куни мутлоқ вазн (+87) тоифасидаги баҳслар ўтказилиб, унда бир йўла икки нафар спортчимиз даянга чиққан эди.

Дунё рейтингида биринчи ўринни эгаллаб турган Жасур Бойқўзиев иккинчи давра баҳсида кореялик Чи Жол Хога олтин очко фарқи билан 3:4 ҳисобида имкониятни бой бериб қўйганди. Айнан кореялик таэквондо устаси якунда Самсун Гран-Приси ғолиблигини қўлга киритди.

Амалдаги жаҳон чемпиони Дмитрий Шокин эса ярим финалга қадар мағлубиятсиз етиб борган ва бу босқичда ҳакамларнинг хатоси эвазига эронлик рақибига 5:6 ҳисобида ютқазиб, бронза медали билан тақдирланганди.

Кеча, 19 сентябрь куни -80 кг вазн тоифасида даянга чиққан ўзбекистонлик спортчилар – ака-ука Максим ва Никита Рафаловичлар медаллар учун баҳсларга киришишди. Ўзбекистонлик таэквондочилар мос равишда биринчи ва иккинчи давра учрашувида мағлубиятга учрашди. Бу ҳақда "Оламспорт.сом" нашри хабар берди.

Айни пайтда Жасур Бойқўзиев 338 очко билан дунё рейтингида ҳамон биринчи ўринни эгаллаб турибди. Дмитрий Шокин эса иккинчи поғонадан жой олган. Ака-ука Рафаловичлар ушбу рейтинг очколари орқали Рио-2016га бориш имкониятлари деярли йўққа чиқди. Энди улар келаси йили ўтказиладиган Осиё саралаши орқали Олимпия ўйинлари йўлланмасига эга бўлишлари мумкин.