Американинг Линкольн (Небраска штати) шаҳри фуқароси 1974 йилда автомобилини белгиланмаган жойга тўхтатгани учун белгиланган жаримани 2015 йил сентябрь ойига келибгина тўлади.

Маҳаллий ОАВнинг ёзишича, 41 йил муқаддам Небраска университети талабаси бўлган 65 ёшли Кент Бройхилл мазкур таълим маскани ҳудудини қўриқлаган полиция томонидан автомобилини белгиланмаган жойда қолдириб кетгани учун жаримага тортилган. Ёш талаба жаримани ўша пайтдаёқ чек орқали тўламоқчи бўлган. Бироқ университет кассаси фақат нақд пул олишини маълум қилган. Полиция ўша куни ўз битирув кечасини нишонлаётган Бройхиллни биринчи имконият бўлиши биланоқ жаримани тўлаш шарти билан қўйиб юборган. Бироқ Бройхилл полицияга берган ваъдасини номаълум сабабларга кўра унутиб юборган.

Унинг сўзларига кўра, жарима ҳақида бутунлай унутиб юборган, аммо яқиндагина курсдошлари билан суҳбатда тўсатдан хаёлига келиб қолган. “Мен ўша пайтда қанча жарима ёзилганини эслай олмадим. Шунинг учун чек дафтарчамни олиб, уларга (университетга) 100 доллар жўнатиб юбордим”, - дея ҳикоя қилиб берди Бройхилл. Қўшимча қилиб, ҳар доим ўз ваъдаси устидан чиқишга ҳаракат қилишини айтиб ўтди.

Хабар қилинишича, олий таълим муассасаси маъмурияти ўз битирувчисининг ҳақиқатгўйлигидан ҳайратга тушгани, бироқ чекни қабул қилмаслигини билдириб, уни ортга қайтариб юборган. Университет вакили буни жарима миқдори ўша вақтларда 100 доллардан камроқ бўлиши мумкинлиги билан боғлаган.