Бугун, 21 сентябрь куни Арманистон фуқаролари мамлакат мустақиллигининг 24 йиллигини нишонлайди. Шу куни пойтахт Ереван шаҳрида бир қатор байрам маросимларини ўтказиш режалаштирилган.

Эрта тонгдан республика раҳбарияти анъанага мувофиқ, "Ераблур" ёдгорлик комплексига ташриф буюради. Кун арман пойтахти марказий майдони – Республика майдонидаги мушакбозлик билан якунига етади.
Арманистон мустақиллиги тўғрисидаги декларация 1990 йил 23 августда Арманистон Олий Кенгаши биринчи сессиясида қабул қилинган эди.

Мазкур ҳужжат билан Арманистон Совет Социалистик Республикасига барҳам берилиб, Арманистон Республикаси мустақиллиги эълон қилинди.
Олий Кенгаш қарори билан 1991 йил 21 сентябрь куни Собиқ Иттифоқ таркибидан чиқиш тўғрисида референдум ўтказилиб, мамлакат мустақиллигига асос солинди; республикада сайлаш ҳуқуқига эга фуқароларнинг 94,99 фоизи мустақилликни ёқлаб овоз беришди. Орадан икки кун ўтиб, Олий Кенгаш Арманистонни мустақил давлат деб эълон қилди.

Ўзбекистон ва Арманистон ўртасидаги дипломатик муносабатлар 1995 йилнинг 27 октябрида ўрнатилган. Икки мамлакат ўртасида айни пайтда иккита келишув ва иккита протокол имзоланган. 2014 йил якунларига кўра, Ўзбекистон ва Арманистон ўртасидаги товар айирбошлаш ҳажми 3622,3 минг долларни ташкил этди.