Европадаги ўткир миграцион инқироз Сурия билан чамбарчас боғлиқ ва уларни алоҳида-алоҳида ҳал қилиб бўлмайди. Бу ҳақда Женевада БМТнинг инсон ҳуқуқлари кенгаши 30-сессиясида БМТнинг Суриядаги инсон ҳуқуқларининг бузилишини тергов қилиш комиссияси раҳбари Паулу Сержиу Пинейру таъкидлаб ўтди.

Пинейру комиссиянинг навбатдаги баёнотини тақдим қила туриб, “Туркия, Ливан, Иордания ва Ироқда йиллар давомида мавжуд бўлган қочқинлар билан боғлиқ муаммо катта даражада Суриядаги можаро туфайли юзага келмоқда”, деб айтди. “Улар бир-бири билан чамбарчас боғлиқ ва бирини иккинчисини ҳал қилиб турмай ҳал қилиб бўлмайди”, деб қўшимча қилди Пинейру.

Пинейрунинг таъкидлашича, Сурия аҳолиси ўз ерини ташлаб кетаётгани “урушаётган томонларнинг асосий жабрдийдаси оддий фуқаролар бўлаётганлиги” билан тушунтирилмоқда.