ОАВда пайдо бўлган хабарларга кўра, 19 сентябрь куни оламдан ўтган Дубай амирининг катта ўғли, шаҳзода шайх Рашид ибн Муҳаммад Ал-Мақтумнинг вафотига аввал айтилганидек юрак хуружи сабаб бўлмаган. Эроннинг "Фарс" ахборот агентлиги хабар беришича, у Ямандаги ҳарбий ҳаракатлар ҳудудида ҳалок бўлган.

"Шайх Рашид Яман ҳудудидаги Мариб провинциясида, БАА ҳарбийлари қароргоҳига шиаларнинг "Ансор Аллоҳ" гуруҳи жангарилари томонидан берилган артиллерия зарбалари натижасида ҳалок бўлди", деб хабар беради агентлик Яман ҳудудидаги ҳарбий ҳаракатларда иштирок этаётган манбаларга асосланган ҳолда.

19 сентябрь куни Дубай амирлиги маъмурияти Дубай амирлиги тахти ворисларидан бири шайх Рашид ибн Муҳаммад Ал-Мақтум юрак хуружи туфайли 34 ёшида вафот этгани ҳақида расман хабар қилганди.

БАА ҳукумати унинг ўлими тафсилотларига тўхталмаган.

Маълумот учун, 13 сентябрь куни БАА қўшинлари Яманнинг Мариб вилоятида исёнчи ҳусийчиларга қарши қуруқликдаги ҳарбий амалиётларни бошлаганди.

Айни вақтда Яманда араб давлатлари коалициясига мансуб 10 мингга яқин аскардан иборат қуруқликдаги қўшинлар жойлаштирилган.