Тошкентдаги “Ўзбекистон” спорт мажмуасида 1-3 октябрь кунлари Ўзбекистон тарихида учинчи марта дзюдо спорт тури бўйича Гран-при серияси мусобақаси бўлиб ўтади

Гран-при серияси мусобақалари ҳар йили дунёнинг 10та давлатида ўтказилади. Тошкент бундай мусобақаларни ўтказиш ҳуқуқини 2016 йилгача 4 йиллик муддатга қўлга киритган.

Ўзбекистонда спортга ажратилаётган катта эътибор, ўзбек дзюдо мактабининг тан олиниши ва нуфузи, ўзбек дзюдочиларининг халқаро ареналардаги муваффақиятлари Ўзбекистон жаҳондаги энг йирик спорт мусобақаларидан бирини қабул қилишига таъсир кўрсатган омиллар бўлди.

Халқаро дзюдо федерацияси вакилларининг эътироф этишича, Ўзбекистонда ўтказилган Гран-при сериясининг 1- ва 2-мусобақалари юқори савияда ўтказилди. Биринчи Гран-При мусобақасида 20дан ортиқ, 2-сида эса 42та давлат спортчилари иштирок этишди.

Бу йилги мусобақада эса деярли 60та давлат дзюдочилари иштирок этишларини тасдиқлашди. Бу бежизга эмас, чунки мусобақада қўлга киритилган очколар Рио-де-Жанейрода ўтказиладиган 2016 йилги Олимпиядага бориш ҳуқуқини қўлга киритиш учун рейтинг балларига қўшиб борилади.

Ўзбекистон дзюдо федерациясининг маълум қилишича, шу муносабат билан 30 сентябрда Тошкентдаги Wyndham (собиқ “Дедеман”) меҳмонхонасида матбуот-анжумани бўлиб ўтади.