АҚШнинг Warner Bros. киностудияси хитойлик ҳамкорлар билан Хитой бозорига мўлжалланган фильмларни суратга олувчи қўшма студияни яратишга келишиб олишди, деб хабар бермоқда The Wall Street Journal нашри.

Қайд этилишича, янги киностудия Flagship Entertainment Group деб номланди ва унинг қароргоҳи Гонконгда жойлашади.

Киностудиянинг 51 фоиз акцияси China Media Capital бошчилигидаги критлик инвесторларга, қолган 49 фоизи эса  Warner Bros.’га тегишли бўлади.

Экспертларнинг фикрича, яқин орада Хитой мамлакатдаги иқтисодий ўсишнинг секинлашишига қарамасдан, энг йирик кино бозорига айланади. 2014 йилда Хитойда фильмлар намойишидан олинган тушум 34 фоизга, яъни 4,8 млрдгача ошган, АҚШ ва Канадада эса 5 фоизга камайиб, 10,4 млрд долларни ташкил қилган.