Эрон армияси бошлиқларидан бири Атаолла Салеҳи ўз аскарларининг Исроилни йўқ қилиб юбориш истагида экани ҳақида айтди. Ушбу юқори мартабали ҳарбий амалдор Эрондаги Tasnim ахборот агентлигига берган интервьюсида шу ҳақида гапирган.

"Биз Исроилни аниқ йўқ қиламиз. Биз уларнинг ўзимизга ҳужум қилишини кутиб ўтирмасдан, уларга яқин 25 йил ичида ўзимиз биринчи бўлиб ҳужум қиламиз ва уларни яксон қиламиз", дейди генерал-майор Салеҳи.

Унинг айтишича, Тел-Авивнинг қулаши АҚШ учун ҳам ижобий ҳол бўлади ва бу мамлакат исроилликларнинг таъсиридан қутилади.

2015 йилнинг 9 сентябрь куни Эроннинг диний раҳнамоси оятуллоҳ Али Хаменеи яҳудийлар давлати кейинги чорак асрда йўқ қилинишини башорат қилганди.

Маълумот учун, Эрон ва Исроил ўртасидаги дипломатик муносабатлар 1979 йилда Теҳронда инқилоб амалга оширилгач, узилганди. Эрон ўшандан кейин Исроилни давлат сифатида тан олмаслигини билдирган.

Бироз олдинроқ, Европа етакчилари Эронни Исроилни давлат сифатида тан олишга чақирганди.