Жанубий Корея ОАВлари хабарларига кўра, LG Display компанияси яқин орада букилувчи смартфонлар ва фаблетлар учун дисплейлар ишлаб чиқаришни бошлайди.

Қайд этилишича, янги турдаги букилувчан экранларнинг ишлаб чиқарилиши дастур ишлаб чиқариш бизнесига эга қандайдир корпорациянинг буюртмаси бўйича ўзлаштириб олинади. Бу сирли буюртмачи high-end синфидаги смартфонлар сегментида Apple ва Samsung компанияларига рақобатчилик қилмоқчи.

LG буюртмачиси Samsung’нинг букилувчи дисплейларини ҳам синовдан ўтказган, бироқ қандайдир сабабларга кўра улардан фойдаланишдан воз кечишга қарор қилган. LG’нинг ҳамкори номи келтирилмаётган бўлсада, гап Microsoft корпорацияси ҳақида кетаётгани тахмин қилинмоқда.

Шунингдек маълум қилинишича, бу дисплейларнинг ишлаб чиқарилишига 900 млн долларлик сармоя киритилган. Экранлар органик светодиодлар (OLED) технологияси негизида ишлаб чиқарилиши тахмин қилинмоқда. Шунингдек, бу дисплейларнинг чидамлилиги анча юқори бўлиши айтилмоқда: уларни 100 минг мартагача букиб, яна ўз ҳолига келтириш мумкин бўлади.

Samsung бир неча кун аввал букилувчи смартфонлар ишлаб чиқаришни режалаштираётгани маълум бўлганди. Бундай қурилмалар 2016 йилнинг январидаёқ намойиш қилиниши кутилмоқда.