Россиялик режиссёр Никита Михалков томонидан ишланган "Солнечный удар" фильми "Оскар" мукофотининг "Энг яхши хориж" фильми номинациясида иштирок этади. Бу ҳақда ТАСС нашрига "Оскар" мукофоти бўйича Россияда тузилган қўмита раҳбари Владимир Меньшов маълум қилган.

Биз Никита Михалковнинг "Солнечный удар" номли картинасини танладик", деб маълум қилган Меньшов.

"Солнечный удар" картинаси Иван Буниннинг шу номли асари асосида суратга олинган бўлиб, режиссёр бу асарни саҳналаштириш ҳақида ўтган асрнинг 80-йилларидан буён ўйлаб келган, фақат 2010 йилдагина киносценарийни тайёрлашга муваффақ бўлган ва ижодий ҳамкорлар билан ишга киришганди.

Ушбу фильм премьераси 2014 йилнинг 3 октябрь кунида Белград шаҳрида ўтказилганди. Фильм ўтган йилнинг 9 октябридан бошлаб кинопрокатларда пайдо бўлган.

2015 йилнинг январида бу фильм 2014 йил якунлари бўйича "Энг яхши фильм" сифатида "Золотой орел" мукофоти билан тақдирланган.