Volkswagen компаниясининг бош ижрочи директори Мартин Винтеркорн 25 сентябрда ўз ўрнини Volkswagen президенти Маттиас Мюллерга бўшатиб беради. Бу ҳақда Tagesspiegel нашри хабар берган.

Компания кузатув кенгаши президиуми 23 сентябрь куни йиғилиши айтилмоқда.

Сентябрь бошида президиум Винтеркорн билан шартномани 2018 йилнинг охирига қадар узайтиришни маслаҳат берган эди. Аммо компания сўнгги кунларда дунё бўйича 11 миллион автомобилига тегишли катта муаммо билан тўқнаш келмоқда.

Гап автомобилларнинг ҳавога чиқарадиган зарарли газ миқдори текширувларининг сохталаштирилгани натижасида АҚШ ва қатор давлатларда бошланган тергов ишлари ҳақида бормоқда.

Можаролар оқибатида Volkswagen акциялари сешанба куни Франкфуртдаги савдоларда 18,1 фоизга тушиб кетган.

Бундан олдинроқ, Volkswagen 11 млн автомобилга бузуқ дастурий таъминот ўрнатилган бўлиши мумкинлиги ҳақида хабар берилганди.