"Зенит" жамоасининг бразилиялик ҳужумчиси Халк Санкт-Петербургдаги Невский проспектида ўтказилган кичик хайрия тадбирида иштирок этди ва "Давай-давай!" номли ушбу тадбирни якунлади. Бу ҳақда питерликлар жамоаси расмий сайтида маълум қилинган.

Мухлислар Артём Двуреченский исмли ногирон болага тиббий ёрдам кўрсатиш учун талаб қилинадиган 1 миллион 335 минг 461 рублни йиғиб бўлишди ва Халк шаҳар марказига аввал ваъда қилган ишни амалга ошириш учун йўл олган.

Ушбу тадбир 2015 йилнинг бошида старт олган, унда ўтган мавсум якунларига кўра Россиянинг энг яхши футболчиси номига сазовор бўлган Халк биринчилардан бўлиб ўз иштироки ҳақида маълум қилганди.

"21 сентябрь куни Халк ўз ваъдасига биноан эрталабки машғулотлардан кейин, ёмғир ёғиб турган маҳалда шаҳар марказига йўл олди ва ўзини кутиб турган Артёмга ўз исми туширилган футболкани кийдириб қўйиб, қўшиқ куйлашни бошлади. Халк ўзининг "мўъжазгина концерти" учун Бразилиядаги энг машҳур қўшиқлардан бири Ai Se Eu Te Pego қўшиғини танлади", дейилади хабарда.

Шаҳарликлар ярим дақиқа ўтмасдан унинг атрофини ўраб олишган.