АҚШ ҳукумати Саудия Арабистонига Гуантанамодаги маҳбус Абдулла Шалабийни топширади, деб хабар бермоқда Reuters ахборот агентлиги. 

“АҚШ Саудия Арабистонига АҚШнинг Гуантанамодаги қамоқхонани ёпишга уринишларини қўллаб-қувватлаётгани учун миннатдорчилик билдиради”, дейилмоқда хабарда.

BBC News хабарига кўра, ёши 39да бўлган Шалабий ўз вақтида "Ал-Қоида" раҳбари Усама бен Ладеннинг тан соқчиларидан бири бўлган.

Маълум қилинишича, Шалабий 2001 йилда Покистонда қўлга олинган ва Кубага жўнатилганди.

Қайд этилишича, АҚШ ҳукумати Саудия Арабистони ҳукумати билан маҳбуснинг кўчирилишида барча хавфсизлик чораларига амал қилиниши бўйича яқиндан ҳамкорлик қилмоқда.

Пентагонда қайд этилишича, Гуантанамода яна 114 маҳбус қолмоқда.

Пентагон ҳисоботига кўра, эндиликда ушбу маҳбусни қатъий назоратда тутиб туришга ҳожат йўқ.

Шунингдек, АҚШ томонидан унга нисбатан расмий айблов эълон қилинмаган. У Саудия Арабистонида ҳарбийлар учун махсус реабилитация дастуридан ўтказилади.

Эслатиб ўтамиз, АҚШ президенти Барак Обама ўзининг президентлик муддати тугагунича Гуантанамодаги қамоқхонани ёпишни ният қилган.