BMW компанияси McLaren фирмаси билан биргаликда суперкар яратиш устида ишлаётганини инкор қилди. Бу ҳақда BMW M GmbH бўлинмаси директори Франк ван Милга таянган ҳолда Motoring нашри хабар бермоқда.

Унинг сўзларига қараганда, у ҳам, Бавария маркасининг бош директори Гаральд Крюгер ҳам, BMW янги тадқиқот ва ишланмалар бўлими бошлиғи Клаус Ролих ҳам Британия фирмаси билан қўшма лойиҳа борасида музокара олиб бормаган.

“Биз McLaren компаниясига қойил қоламиз, улар билан илгари ҳамкорлик қилганмиз, аммо ҳозирликда бундай масала кун тартибида йўқ”, - унинг сўзларини келтиради нашр.

Топ-менежернинг маълум қилишича, айни пайтда компаниянинг асосий спорткари янги чиқарилган i8 гибриди бўлиб, унинг ҳаётий силсиласи давомида рақобатчи суперкар ишлаб чиқариш режада кўзда тутилмаган.