Корея Республикасининг экспорт-импорт банки (Эксимбанк) "Асака" АТБга (акционерлик тижорат банки) 160 млн доллар миқдорида кредит тақдим этади. Бу борадаги келишувнинг имзолангани ҳақидаги ахборот банк президенти Ли Дун Хуннинг Ўзбекистон президенти Ислом Каримов билан учрашувида келтирилди.

“Музокаралар чоғида Ўзбекистон ва Эксимбанк ўртасидаги инвестицион ҳамкорлик масалалари муҳокама қилинди”, - хабар қилди давлат раҳбарининг матбуот хизмати.

Расмий маълумотларга кўра, 1999 йилдан буён Ўзбекистонда ушбу банк маблағлари ҳисобига 935 млн долларлик лойиҳалар амалга оширилган.

2012 йилдан бугунги кунга қадар ижро этилаётган лойиҳалар қиймати эса 1.2 млрд долларни ташкил қилади. 900 млн долларлик лойиҳалар ишланиш босқичида турибди. Банк Сургил кони негизида газ-кимё комплексининг қурилишига 1 млрд доллар ажратган.