Мактаб ўқувчиларининг бир хил кийимда таълим олиши уларнинг ўзлаштириш кўрсаткичларига ҳам таъсир ўтказади. Бу ҳақда “Оила даврасида” газетасида чоп этилган мақолада айтилди.

Муаллиф мактаб формасининг бир хил намунада бўлишига қарши, фарзандига ўзи хоҳлаган кийимни олиб беришга ҳаракат қиладиган айрим ота-оналарнинг эътирозлари масаласига тўхталган. Мақолада Халқ таълим вазирлиги ҳамда соҳа мутахассисларининг фикри акс этган.

Айтилишича, бир хил кийим ўқувчиларни ҳар жиҳатдан тенглаштиради, эътиборни тўлиқ таълим-тарбияга қаратади. Бола ҳам ўз навбатида мактабга билим олиш учун боришини тушуниб етади. Қолаверса, бу таълим муассасаларидаги ижодий муҳитни янада яхшилаши иддао этилди.

Муаллифнинг фикрича, дресс-коднинг жорий қилиниши болалар ўртасида келиб чиқадиган “ижтимоий тенгсизликнинг олдини олиши” баробарида, мактаб ички тартиб-интизомини сақлашга хизмат қилади.

Хилма-хил кийим эса, муаллифнинг айтишича, ўқувчилар “психологиясига салбий таъсир ўтказиши аниқ”. Чунки қимматроқ кийиниб келган ўқувчи синфнинг “лидери” сифатида кўрилиши мумкин.

Мақолада бу борадаги жаҳон тажрибаси ҳақида ҳеч қандай маълумот келтирилмади. Жумладан, нега аксарият ривожланган мамлакатларда мактаблар учун ягона униформа жорий этилмаганлиги ҳақида савол очиқ қолдирилди.