Бугун эрта тонгдан муборак Қурбон ҳайити эзгулик, меҳр - оқибат, шукроналик байрами сифатида қарши олинди.
Маҳаллалар, гузар ва кўчаларда саҳардан байрамга тараддуд ишлари бошланди. Юлдузлар ҳали самони тарк этмай эшик - дарвозалар очилди. Онахонлар, келин- қизлар хонадонлар олдига сув сепиб, супуриб сидириб, кўчаларга файз бағишладилар. Барча мўмин мусулмонлар ҳайит намозини ўқиш учун жоме масжидлари сари йўл олди.
Пойтахтимиздаги “Шайх Зайниддин” жоме масжиди ҳам узоқ яқиндан келган намозхондлар билан гавжум бўлди. Намоз бошланиши олдидан масжид имом хатиби Одилхон қори Юнусхон ўғли қутлуғ Қурбон ҳайитининг файзу баракоти, юртимизда ислом маданияти ва қадрятларига берилаётган эътибор, бебаҳо неъмат - тинчлик ва осойишталикнинг аҳамияти ҳақида амру маъруф қилди. Шундан сўнг Қурбон ҳайити намози адо этилди. Жамоат дуога қўл очар экан, бугунги кунлар учун шукроналик билдирилиб, муқаддас Ватанимиз, қалби эъзгуликка тўла халқимиз ҳаққига дуолар қилинди.
Намоздан сўнг юртдошларимиз юзда табассум билан байрам билан бир бирларини қутлашди. Қутлуғ айём шукуҳи юртимиз бўйлаб давом этмоқда.

“Шайх Зайниддин” жоме масжиди матбуот хизмати / Muxlis.uz