Венгрия телеканалларидан бирининг ходими томонидан чалиб йиқитилган қочқин ал-Қоида жангариси бўлиб чиқди.

International Business Times нашрининг ёзишича, бошқа қочқинлар уни “таниб қолишган”.

Усома Абдулла Мусҳин Сербия билан чегарадаги Реске қароргоҳидан қочаётганида мухбир Петра Лазсло томонидан чалиб йиқитилиши дунёга кенг муҳокамаларга сабаб бўлди. Охир-оқибат журналист қиз ишдан ҳайдалди, Мусҳин эса Испанияда футбол мураббийсига айланди.

Аммо курдларнинг Демократик партияси расмий баёнот чиқариб, Мусҳин “ал-Қоида”нинг Суриядаги қаноти – “Жабҳат ан-Нусра”нинг жангариси эканлигини маълум қилди. Бунга исбот тариқасида унинг ижтимоий тармоқдаги ўчириб ташланган саҳифасидан скриншотлар келтирилди.

Шунингдек, сурияликлар уни 2004 йилда Қамишли шаҳридаги исённи бостиришда иштирок этганликда айбламоқда.