Сурия ҳарбий-ҳаво кучлари Хомс вилоятида “ИШИД” террорчилик гуруҳининг бир неча позицияларига зарбалар берди. “Ал-Маядин” телеканалининг маълум қилишича, жангариларнинг насроний Садад шаҳри остоналаридаги позицияларига зарбалар берилган. Учувчилар, шунингдек, жангариларнинг Ас-Сухна ва Пальмирадаги истеҳкомларига зарбалар йўллади. Зарбалар натижасида 50 дан кўпроқ жангари йўқ қилинди.

Ҳарбий ҳаракатлар Хомсдан 120 км узоқликда жойлашган Аш-Шоир табиий газ кони атрофида ҳам олиб борилмоқда. Жангарилар бу ерга яна ҳужум қилишди, Сурия Қуролли кучлари уларнинг ҳужумини қайтаришда авиация қўллади.

Сурия ҳукумат қўшинларининг муваффақиятли операциялари ҳақидаги маълумотлар Ҳалаб ва Дайр-аз-Зора шаҳарларидан ҳам олинмоқда. Маълумотларга кўра, Суриянинг шимолий пойтахти ҳисобланган Ҳалабда ҳарбийлар ва кўнгиллилар Бани-Зайд, Рамос, Рашидин, Ас-Сахҳур ва Бўстон-Баша туманларидаги жангариларга тегишли ракета отувчи қурилмаларни йўқ қилишган.