Австралиянинг Перта шаҳридан Гонгконгга парвоз қилаётган Cathay Pacific авиакомпаниясига тегишли A330 самолёти двигателлардан бирида юзага келган ёнғин сабабли 25 сентябрь куни Индонезиянинг Бали оролида жойлашган Денпасар халқаро аэропортига фавқулодда қўнишни амалга оширди.

Бу ҳақда Гонгконгнинг Cathay Pacific авиакомпаниясига асосланиб РИА “Новости” агентлиги хабар тарқатди.
Ҳодиса вақтида самолёт бортида 251 йўловчи бўлган.
“Двигатель носоз бўлгани сабабли фавқулодда қўнишни амалга ошириш зарурияти туғилди. Самолёт Денпасар аэропортига муваффақиятли қўндирилди”, - дея 9News телеканали авиакомпания хабаридан иқтибос келтирди.

Учиш-қўниш йўлагида самолётни ёнғин хавфсизлиги жамоаси кутиб олди. Йўловчилар ва экипаж аъзоларидан ҳеч ким жароҳатланмаган.
Авиакомпания ҳодиса сабабларини ўрганмоқда.