Чехия президенти Милош Земан қочқинлар мамлакатдаги қоидаларни ҳурмат қилишлари кераклигини, акс ҳолда яхшиси уйларига қайтишлари лозимлигини айтди. Бу ҳақда Hospodarske noviny газетаси сайтида маълум қилинди.  

Земан бу ҳақда мамлакатнинг шимоли-шарқидаги Вишни Лготи қишлоғига ташрифи пайтида айтди.

Земан маҳаллий аҳоли билан учрашуви пайтида қочқинлар борасида кескин фикр билдириб, “Сизларни бу ерга ҳеч ким чақирмади. Бу ерга келдингизми, унда биз сизнинг давлатингизда бўлганда амал қилганимиздек бизнинг қоидаларга амал қилинг. Агар ушбу талабимиз ёқмаётган бўлса, унда ортингизга югуринг!”, деб айтди. Унинг бу сўзлари аҳолининг қарсаклари билан қаршиланди.

Чехия президенти қочқинлар лагерига ташриф буюришдан бош тортди. “Мен хорижликларни кўргани бормайман, уларни Пражский Градга (президент қароргоҳи) расмий қабулга чақираман”, деб айтди Земан.   

Земан матбуот котиби Иржи Овчачекнинг айтишича, президент лагерга боришдан воз кечишига сабаб, уни “авваламбор чех фуқароларининг бу вазиятга фикрлари қизиқтиради”.

Чехия қочқинларни тақсимлаш режасига қарши чиққан Европа Иттифоқининг 4 та давлатидан бири бўлди. Бироқ ушбу режа ЕИ ТИВ раҳбарларининг учрашувида кўпчилик овоз билан қабул қилинди.