Ўзбекистоннинг биринчи рақамли эркак теннисчиси Денис Истомин Санкт-Петербургда бўлиб ўтаётган St. Petersburg Open 2015 мусобақасининг яримфиналига чиқиш учун курашади.

Жаҳоннинг 62-рақамли теннисчиси немис теннисчиси Бенжамин Беккерни 2:6, 7:6 (7:5), 6:4 ҳисоби билан мағлуб этиб, мусобақанинг чоракфиналига йўл олди.

Икки теннисчи ўртасидаги барча учрашувлардаги ҳисоб Истомин фойдасига 6:1 кўринишини олди.

Истомин чоракфиналда жаҳоннинг 21-рақамли теннисчиси австриялик Доминик Тим билан беллашади. Бу учрашув теннисчиларнинг ушбу ойдаги иккинчи учрашуви бўлади. Биринчи учрашув US Open мусобақасининг 2-раундида бўлиб ўтган ва унда Истоминнинг учрашувни давом эттиришдан воз кечиши сабабли Тимнинг қўли баланд келган эди. 

Бу орада Истомин маҳаллий журналистларга албатта Эрмитаж музейига ташриф буюришга ваъда берди. “Кейинги ҳафтада Хитойда мусобақа бор, бироқ у бироз кутиб турса бўлади”, деб ҳазиллашиб қўйди Истомин.