Қашқадарё вилояти Шаҳрисабз туманидаги Наматон қишлоғида Ўзбекистондаги илк хусусий зооцирк иш бошлади. 12news сайтининг “Народное слова” нашри хабарига асосланиб маълум қилишича, зооцирк майдони 2 гектарни ташкил этиб, унда 200га яқин ўтхўр ва йиртқич жониворлар, қушларнинг 40 тури сақланмоқда.

Зооцирк ҳудудида, шунингдек, Шаҳрисабз тарихи кичик музейи ва болалар ўйин майдончаси мавжуд. Зооцирк майдонида уч минг кишига мўлжалланган амфитеатр ҳам жойлашган бўлиб, унда ҳар куни томошалар кўрсатилади.
Қайд этилишича, мазкур зооциркнинг қурилиши икки йил аввал бошланган бўлиб, 2013-2015 йилларда Қашқадарё вилоятида туризм соҳасини ривожлантириш дастурига ҳам киритилди.

Банклардан бирининг туман бўлими шу мақсадда 300 миллион сўм миқдорида кредит маблағи ажратди. Ушбу маблағлар бир қисм ҳайвонларни сотиб олишга сарфланди.
Айни пайтда зооциркда 30 нафар мутахассис фаолият кўрсатмоқда. Бироқ яқин келажакда яна 120 киши иш билан таъминланиши кутилмоқда.