Сурия инқирозини ҳал қилишнинг ягона йўли давлат структураларини мустаҳкамлаш ва террорчиликка қарши кўмак бериб боришдир, деб ишонади Россия президенти Владимир Путин. Бу ҳақда у CBS телеканалига берган интервьюсида айтиб ўтди.

Журналист Чарли Роуз олган интервьюнинг бир қисми инглиз тилига ўгирилган ҳолда трансляция қилинди.
Путиннинг фикрича, Суриянинг расмий ҳукуматини йўқ қилишга қаратилган бошқа ҳар қандай ҳаракатлар Ливиядаги сингари вазиятни юзага келтириши мумкин.

“У ерда барча давлат структуралари вайрон қилинган, - деди Россия президенти. – Биз ўхшаш вазиятни Сурияда кўрмоқдамиз. Сурия инқирозини ҳал қилишнинг давлат структураларини мустаҳкамлаш ва террорчиликка қарши курашда кўмак беришдан бошқа йўли йўқ”.