ХХР раиси Си Цзиньпин АҚШга Air China компаниясига тегишли оддий йўловчи самолётида учиб келди. Бу ҳақда The South China Morning Post нашри хабар бермоқда.

ХХР ТИВ протокол департаменти собиқ директори Лу Пэйсиннинг сўзларига қараганда, Хитой етакчиси Boeing 747-400 лайнеридан фойдаланган. Самолёт махсус тайёрланиб, унда меҳмонхона, ётоқхона ва иш кабинети яратилган. Бир ой мобайнида қўриқлаш хизмати уни техник кўрикдан ўтказган ва экипаж танлови билан шуғулланган.

Одатда Цзиньпин B-2447 ва B-2472 лайнерларидан фойдаланади. Унинг сафарларидан сўнг самолётлар қайтадан жиҳозланиб, мунтазам рейсларда қўлланади.
2001 йилда ХХРнинг ўша пайтдаги раиси Цзян Цзэминь ўз бортига эга бўлиш мақсадида лайнерлардан бирини АҚШнинг Сан-Антонио халқаро аэропортига қайтадан жиҳозлашга юборган эди. Аммо текширув давомида Хитой махсус хизматлари бортдан 27та эшитиш ускуналарини топди.