Хитой етакчиси Си Цзиньпиннинг Вашингтонга ташрифи АҚШ ва Хитой ўртасида бир қатор ҳужжатларнинг қабул қилиниши ва етакчиларнинг Оқ уйда берган қўшма матбуот-анжумани билан якунланди. 

Иккала етакчи ўзаро ҳамкорликка юқори баҳо бердилар, бироқ келишмовчиликларнинг сақланиб қолаётганини яшириб ўтирмадилар.

Барак Обама музокаралар олдидан Вашингтон ва Пекин “кейинги юз йиллик тақдирини белгилаш каби тенгсиз имкониятга эга эканликларини” таъкидлаб ўтди.

Си Цзиньпин бунга жавобан оддийроқ масалаларни ҳал қилишни, яъни “йирик давлатлар ўртасидаги муносабатларнинг янги модели” негизида “Хитой-АҚШ муносабатлари тарихида янги бўлимни ёзишни” таклиф қилди.

Матбуот-анжуманида америкалик журналистларни АҚШ ичидаги муҳим сиёсий янгилик, яъни АҚШ конгресси қуйи палатаси спикери лавозимидан Жон Бейнернинг кетаётганигина қизиқтирди. Хитойлик журналистлар эса фақатгина икки томонлама муносабатлар ҳақида саволлар беришди. 

Шунинг учун бошқа халқаро темалар, жумладан АҚШ ва Россия президентларининг учрашуви, Суриядаги вазият умуман эсга олинмади.

АҚШ-Хитой саммити якунларига кўра, Оқ уй икки давлат етакчисининг иқлимнинг ўзгариши муаммоси бўйича қўшма баёноти ва учта маълумотномани тарқатди. Маълумотномалардан биринчиси Хитой етакчисининг сафари якунларига, иккинчиси иқлимга, учинчиси эса АҚШ-Хитой иқтисодий муносабатларига бағишланди.