Таиланд ҳукумати 17 август куни Бангкок шаҳрида амалга оширилган терактга алоқадорликда гумон қилиниб, ҳибсга олинган хорижлик шахс терактни ижро этгани тасдиқлангани ҳақида маълум қилди.

Полиция вакили Прают Таворнсирининг айтишича, ҳибсда сақланаётган туркиялик Адам Қоратоғ ўз айбини тан олган ва терактни қандай содир этгани ҳақида кўрсатма берган.

Полиция маълумотига кўра, у ўз ишини бажарганидан кейин ташқи кўринишини ўзгартирган ва шундан сўнг видеокамералар нигоҳига тушганди.

Қоратоғ ўтган ойнинг охирида теракт ижрочиси сифатида гумон қилиниб, қўлга олинганди. Унинг квартирасидан портловчи қурилмалар ясашда фойдаланиладиган воситалар топилган.